Frábærar salatvefjur með kjúklingi, grænmeti, ávöxtum og dásamlegri hnetusósu allt að hætti Bryndísar

Við komum til Íslands nú á föstudaginn og tókum hús hjá foreldrum mínum, Ingvari og Lilju. Snædís fór með tvö yngstu börnin með hádegisvélinni en ég varð að standa vaktina á barnagigtardeildinni frameftir og fór því um kvöldið. Prógrammið um helgina var auðvitað þéttbókað. Hádeigisverður hjá tengdó í Kópavoginum á laugardaginn, matarmarkaður, búðarráp og svo matarboð hjá Vigdísi og Bassa. Þar fengum við ljúffengt Chilli con carne - ekki svo ósvipað því sem sjá í þessari færslu, sjá hérna. 

Í gær fórum við svo í Laugardalslaugina og svo í langa gönguferð um Öskjuhlíðina sem er nú vin innan borgarmarkanna. Það var stillt í veðri og ilmurinn af greninu og birkinu fyllti vitin. Meðfram stígunum hafði sprottið upp talsvert af sveppum sem því miður voru ekki ætir - en nóg til að vekja tilhlökkun til sveppatínslu í skógunum á Skáni. 



Um kvöldið fórum við í matarboð hjá Sverri og Bryndísi og strákunum þeirra í Norðurmýrinni. Við Sverrir höfum verið bestu vinir síðan að við vorum fimm ára gamlir - nú í 32 ár. Dísus ... hvað maður er að eldast! Bryndís er frábær kokkur - algerlega meiriháttar. Það var hún sem kom mér á bragðið með lambarifjurnar, sjá hérna - sem voru alveg dásamlegar. Og svo gerði hún handa mér nautasteik sem var svo stórkostleg að ég eldaði hana fyrir bókina mína - nánar um það þegar nær dregur jólunum. Í gær trompaði hún svo alveg með þessum rétt. 

Frábærar salatvefjur með kjúklingi, grænmeti, ávöxtum og dásamlegri hnetusósu allt að hætti Bryndísar

Hráefnalisti

1 kg kjúklingabringur
1/4 bolli soya sósa
2 msk lime safi
1 tsk engifer
1 tsk chilli duft
4 vorlaukar
1 tsk túrmerik
1 msk hlynsíróp
1 msk broddkúmen
Iceberg salat fyrir vefjur
Grænmeti, t.d. gulrætur, mangó, agúrka, melóna, graslaukur, rauð og gul papríka, baunaspírur

Sósa

5 cm engifer
1 rauður chilli
1 dl sítrónusafi
2/3 dl hlynsíróp
2 msk tamarind sósa
2 1/2 dl hnetusmjör


Kjúklingurinn var marineraður í nokkrar klukkustundir áður en hann var eldaður. Fyrst var kíló af kjúklingabringum skorið í þrjár strimla. Þá er eftirtöldu; 1/4 bolli soya sósa, tvær msk lime safi, ein tsk rifið engifer, ein tsk chilli duft, fjórir vorlaukar skornir í þunnar sneiðar, ein teskeið túrmerík, ein matskeið hlynsíróp, ein tsk broddkúmen. Til stóð að grilla herlegheitin en gasið kláraðist þannig að þær voru steiktar á pönnu.

 

Fjölbreytt úrval grænmetis var á boðstólunum. Iceberg salat var notað sem vefjur, og svo gulrætur, mangó og kóríander.

Og það var ennþá meira á boðstólunum; gúrka, heimagerð pækluð agúrka, melóna, graslaukur, rauð og gul papríka og svo ljúffengar baunaspírur sem voru steiktar á pönnu með einni matskeið af sesamolíu og einni matskeið af soyasósu ásamt einni matskeið af ristuðum sesamfræjum. 

Hnetusósan var eiginlega aðalmálið í þessari máltíð. Bryndís kallar hana happ-hnetusósu en hún minnir óneitanlega mikið á satay sósu þar sem undirstaðan er líka hnetusmjör.

Fyrst er þumlungur af fersku engifer, ásamt einum rauðum chilli pipar sett í matvinnsluvél og hakkað. Þá er rúmlega einum dl af sítrónusafa, 2/3 dl hlynsíróp, 2 msk tamarind sósu og 2 1/2 dl af hnetusmjöri bætt saman við og blandað vel saman. Látið standa í ísskáp þangað til að maturinn er borinn fram.

Kjúklingurinn var steiktur á pönnu og svo haldið heitum í eldföstu móti á meðan allt var steikt. Í lokin var 2 msk af soyasósu hellt á pönnuna og svo öllu hellt yfir kjúklinginn. 

Við drukkum Trivento Tribu Pinot Noir frá 2011 sem er ljómandi gott rauðvín frá Argentínu. Ég hef smakkað þetta vín áður - gott ef ekki einmitt með þeim hjónakornum, Sverri og Bryndísi. Þetta er góður sopi - fallega rúbinrautt í glasi, létt fylling með góðu berjabragði og léttri sýru. 

Við vorum alveg yfir okkur hrifin. Þetta er eitthvað sem verður reglulega eldað á mínu heimili.

Svo er ekki annað að gera en að raða þessu saman. Taka laufblað, hnetusósu, baunaspírur, melónu, papríku og kóríander. Dásamlegt. 

Þessi var svo með hnetusósu, kjúklingi, gulrótum, pæklaðri gúrku, baunaspírum og blaðlauk. Himneskt! 

Hvet ykkur eindregið til að reyna þetta! 

Tími til að njóta!

Grillaðar sinnepsgljáðar grísalundir með piparrjómasósu og haloumi og kúrbítssalati

Það hefur verið ljómandi veður undanfarna daga hjá okkur í Lundi. Við gátum notað helgina vel, skotist á ströndina, unnið í að ná smá "brúnku" áður en að við komum til Íslands í lok vikunnar. Mér skilst að það verði bara súld sem bíði okkar á Fróni. En við ætlum að hitta marga vini og ættingja þannig að það mun ekki væsa um okkur!

Við hlökkum mikið til! Valdís Eik, dóttir mín, fór til Íslands fyrir nokkrum vikum og skutu afar og ömmur yfir hana skjólshúsi. Hún hefur unað sér vel. Elsta og yngsta dóttirin spjölluðu saman á Skype nýverið og sú yngsta reyndi að klifra inn í tölvuna - eitthvað virðist hún sakna stóru systur sinnar. Og það gerum við reyndar öll! 

Þetta var ákaflega einfaldur og ljúffengur réttur. Það er eitthvað náttúrulegt við að grilla þegar veðrið er svona gott! Tylla sér með léttvínsglas út á pall og elda utandyra. Og maturinn verður einhvernveginn betri fyrir vikið. Sósan var ofureinföld og samanstóð að mestu úr piparrjómaosti sem ég fann útí búð. Var að reyna að líkja eitthvað eftir íslenska piparostinum sem mér finnst sérlega góður á sinn gúmmíkennda hátt! 

Grillaðar sinnepsgljáðar grísalundir með piparrjómasósu og haloumi og kúrbítssalati

Hráefnalisti

1 kg grísalundir
2 msk jómfrúarolía
2-3 msk Grey Poupon sinnep
Salt og pipar

Meðlæti - Haloumi salat

1 kúrbítur
Haloumi ostur
Salt og pipar
Jómfrúarolía
Laufsalat
Fersk mynta
Sítrónusafi

Hvít sósa

100 ml af rjóma
2 msk græn piparkorn
150 gr piparrjómaostur
Salt og pipar

Fyrst var að pensla grísalundirnar með jómfrúarolíu, salta og pipra og smyrja grófu Grey Poupon sinnepi í ríkulegu magni á lundirnar. Látið standa í 30 mínútur í kæli!

Haloumi salatið var líka einfalt. Lagði beð af grænum laufum sem vaxa í kálgarðinum mínum á disk. Skárum ostinn og kúrbítinn í sneiðar og pensluðum með olíu. Salt og pipar. Og svo grillað. 

Raðað á diskinn. Góðri jómfrúarolíu dreift yfir. Fersk mynta og svo safi úr hálfi sítrónu. Dásamlegt. 

Lundirnar voru grillaðar upp í tæplega 70 gráðu kjarnhita. Það þarf ekkert lengur að stressa sig á svínakjöti. Sýkt svínakjöt hefur ekki verið vandamál í áratugi. 

Kjötið fékk að standa í 10-15 mínútur áður en það var skorið í sneiðar. 

Og á meðan gerði ég sósuna. Setti 100 ml af rjóma í pott ásamt 2 msk af grænum piparkornum og svo 150 gr af piparrjómaosti. Hitað og osturinn bræddur. Saltað og piprað eftir smekk. 

Með matnum nutum við Beringer Stone Cellars Cabernet Sauvignion frá árinu 2011. Þetta er vín frá Kaliforníu og er kraftmikið og ljúffengt vín með ágætri fyllingu og ríkulegu berjabragði. Þurrt rauðvín sem fór vel með svínalundunum.

Þetta var einstaklega ljúffeng máltíð. 

Tími til að njóta! 

Ljómandi grillaður lax með aspas og kirsuberjatómötum með kavíarsósu

Yngsta dóttir mín vex og dafnar. Hún er 10 mánaða nú um þessar mundir og er byrjuð að standa upp og ganga aðeins með. Hún hefur mikla matarlyst og er dugleg að borða þann mat sem er útbúinn handa henni. Og hún er líka dugleg að prófa allan nýjan mat og hafnar engu. Það er sérstaklega gaman að hlusta á hana stynja af ánægðu þegar hún er mötuð - langt "naaaammmmm" fylgir gjarnan þegar hún er ánægð og sátt við það sem í boði er. Hún er meira að segja farin að vilja vera með í eldhúsinu. Alltént var hún dugleg að ýta grindinni áleiðis inn í uppþvottavélina. Og skemmti sér stórvel. Hversu mikil hjálp hún var í eldhúsinu læt ég ósagt ... ef ske kynni að hún lesi þetta einhvern tíma. 

Þetta er einstaklega góður og sumarlegur matur. Grillaður lax með ferskum aspas og nýjum og sætum kirsuberjatómötum. Sósan sem fylgir smakkaði ég í fyrsta sinn hjá nágrönnum mínum, Jónasi og Hrund. Jónas sagði að ég yrði að geta heimilda um þessa sósu en uppskriftina af henni hafði hann fengið hjá eiginkonu annars kollega þegar hann var að vinna í Svenjunga í afleysingum vikunni áður. 

Þessi sósa er ansi ljúffeng. Kavíarinn gefur skemmtilega seltu og sjávarkennt bragð þegar hrognin eru sprengd. Best væri að nota ekta laxahrogn þar sem þau eru stærri en þau eru líka heldur dýr til að hafa með mánudagsfisknum þannig að ég lét mér nægja að kaupa kavíar frá Lysekil sem eru gerð úr "lumpfish" sem á íslensku heitir hrognkelsi. Og er líka ljúffengt.

Ljómandi grillaður lax með aspas og kirsuberjatómötum með kavíarsósu

Og þetta er einfaldur matur og krafðist nær engrar fyrirhafnar. Meira bara uppröðun. En litirnir eru fallegir og maturinn bragðgóður eftir því. 

Við erum bara tvö fullorðin í húsinu um þessar mundir þannig að skammtarnir voru hóflegir. 600 gramma laxaflak var penslað með jómfrúarolíu, saltað og piprað og lagt í ofnskúffu. Safa úr hálfri sítrónu hellt yfir.

Svo var 250 gr af kirsuberjatómötum, "on the vine", raðað í kring og fimmtán aspasspjót. tvær til þrjár msk af jómfrúarolíu var hellt yfir grænmetið og það líka saltað og piprað.

Grillið var blússhitað og bakað á beinum hita í 12-15 mínútur. Þegar fimm mínútur voru eftir var 75 ml af hvítvíni hellt yfir grænmetið og soðið upp.

Sósan var afar einföld. Fjórum matskeiðum af sýrðum rjóma var hrært saman við eina kúfaða teskeið af svörtum kavíar og jafnmikið af rauðum. Einni matskeið af dilli var bætt saman við, safa af hálfri sítrónu og svo smakkað til með salti og pipar.

Ljúffengt og einfalt.

Laxinn var ljúffengur og tómatarnir sætir og góðir. Og aspasinn - mjúkur í gegn og bragðið dásamlegt.

Með matnum fengum við okkur ljómandi hvítvín sem hefur lengi verið í uppáhaldi og ég hef nefnt á blogginu nokkrum sinnum áður - en það er langt síðan síðast. Þetta er hvítvín frá Chile - árgangur 2010 og er einstaklega ljúffengt. Fallega gullið vín, lyktar af ávöxtum, þétt og kraftmikið vín og frískandi á tungu.

Einföld, holl og ljúffeng mánudagsveisla. Vinnuvikan getur eiginlega ekki verið annað en góð þegar maður hefur hana með þessum hætti. 

Tími til að njóta!

Ljúffeng baka með reyktum laxi og púrrulauk og svo önnur með Västerbottenosti

Þetta er nú meira svona örfærsla. Ég hef á síðastliðnu ári bloggað tvívegis um bökur þannig að þetta er eiginlega hálfpartinn svindl! En bökur eru bara svo ári góðar og ég verð alltaf jafnstoltur í hvert sinn sem að ég bý þær til; styn svo af nautnafylltri gleði yfir niðurstöðunni. Safarík og seiðandi, feit og ljúffeng. 

Hægt er nálgast hinar bökuuppskriftirnar með því að nota leitarvélina sem ég kom nýverið fyrir á síðunni minni og er að finna í síðudálkinum hérna hægra megin beint fyrir neðan hvítlaukinn!

Þessa böku gerði ég fyrir miðsumararsveisluna (Jónsmessunótt) sem var um síðustu helgi. Svíar halda upp á Midsommar - á ansi sérstakan hátt. Fyrir þá sem að hafa ekki dvalið í Svíþjóð eða þekkja ekki til þessarar hátíðar þá mun þetta vídeó upplýsa "næstum" allan sannleikann.

Við Íslendingarnir hittumst að þessu sinni heima hjá Signýju Völu og Þóri og börnum þeirra þremur í húsi númer sjö. Þau eru því miður á leiðinni heim og við eigum eftir að sakna þeirra hérna úr hverfinu!

Ljúffeng baka með reyktum laxi og púrrulauk og svo önnur með Västerbottenosti

Og það er líka einfalt að gera bökur. 

Fyrst er að gera deigið; 250 gr af hveiti er blandað saman við 100 gr af smjöri. Svo hálf teskeið af salti og 2 msk af vatni. Blandað saman í hrærivél. Hnoðað saman í kúlu, plastfilmu vafið utan um og sett í kæli í eina klukkustund. 

(LKL-istar geta vel gert þessa uppskrift en þá sleppir maður hveitinu og setur blöndu af möndlumjöli, kókóshveiti og huski, samtals 250 gr í staðinn).

Þá er deigið flatt út, sett í velsmurt eldfast mót og formað eftir mótinu. Allt sem er umfram er skorið af og það er best gert með því að rúlla kökukeflinu yfir mótið. Þá skerst umfram deigið af. 

Næst er að gata degið með gaffli og baka það í kortér í 180 gráðu heitum ofni. 

Þá er að gera fyllinguna. Fimm egg eru hrærð saman við 300 ml af rjóma. Saltað og piprað.

Ég setti 200 gr af reyktum laxi útí mótið og svo einn niðurskorinn púrrulauk. Hellti svo eggjablöndunni ofan í mótið. Bakað í 35 mínútur í 180 gráðu heitum ofni.

Seinni bakan var gerð með Västerbottenosti sem er vinsæll harðostur hérna í Svíþjóð - í stað hans mætti nota einhvern sterkan ost eða söðla alveg um og nota einhver ljúffengan hvítmygluost í staðinn! Setti fyrst eggjablönduna í mótið og svo 300 gr af rifnum osti. Bakað í 35 mínútur við 180 gráður. 

Gott er að láta bökurnar standa í nokkrar klukkustundir áður en þær eru skornar. Þannig verða þær þéttar í sér og auðveldara að skera þær í fallegar sneiðar. 

Gott er að bera bökuna fram með góðu salati og kannski hvítvínsglasi. 

Blóðbergskryddað lambalæri með jus d'agneau og gómsætu blómkálsgratíni

Ég fékk eins og margir aðrir bloggarar sendingu frá Saltverki sem er íslenskt fyrirtæki sem framleiðir sjávarsalt með því að nota jarðhita. Ég sá þetta í verslun þegar við vorum í heimsókn á Íslandi síðastliðið haust og greip með mér einn pakka. Og þetta er ljómandi gott salt - skarpt bragð. Nú fékk ég sendingu af nýjustu vörunum þeirra; blóðbergs-, reykt birki-, lava og lakkríssalt. Í þetta skipti ákvað ég að prófa blóðbergsaltið ásamt Best á lambið og þurrkuðu blóðbergi á íslenska lambalærið sem ég fann í frystinum.

Og ég ætla að hvetja fólk að prófa saltið frá þeim - Saltverk er íslenskt frumkvöðlafyrirtæki sem er staðsett á Reykjanesi við Ísafjarðardjúp. Samkvæmt upplýsingum á heimasíðu fyrirtækisins mun saltgerð hafa verið stunduð á þessu svæðu 1772-1802 á vegum dönsku konungsverslunarinnar. Eftir að verksmiðjan hafði verið sett upp með aðstoð saltgerðarmanna frá Noregi mun framleiðslan hafa verið 80 tonn á ári og var að mestu notað í saltfisksverkun sem var, jú, ein helsta útflutningsvara okkar. Þessi framleiðsla hefur nú verið endurvakin eftir rúmlega tvöhundruð ára stopp!

Maður getur ekki annað en stutt við bakið á svona framleiðslu, sérstaklega þegar hún er eins góð og raun ber vitni. Ég á sannarlega eftir að kippa með mér nokkrum pökkum þegar ég kem heim.

Blóðbergskryddað lambalæri með jus d'agneau og gómsætu blómkálsgratíni

Eins og fram hefur komið átti ég lambalærið í frystinum. Ég blandaði saman blóðbergi, blóðbergssalti frá Saltverki og svo Best á lambið-kryddblöndunni og svo nóg af nýmöluðum pipar. Skar niður tvær gulrætur, tvær sellerístangir, einn lauk og lagði í botninn á ofnskúffu.

Því næst nuddaði ég lambið upp úr jómfrúarolíu, síðan kryddblöndunni og lagði ofan á grænmetið. Skar heilan hvítlauk þvert og lagði með.

Setti út á forhitað grill - 200 gráður - og bakaði við óbeinan hita þangað til að kjarnhiti varð 58 gráður, eða í tvær klukkustundir eða svo.

Með matnum bárum við fram blómkálsgratín. Penslaði fat með jómfrúarolíu, nuddaði hvítlauk í fatið. Skar síðan niður einn haus af blómkáli og raðaði í fatið. Hellti svo 400 ml af rjóma yfir. Sáldraði svo tveimur hvítlauksrifjum ofan á, saltaði og pipraði og lagði að lokum 150 gr af niðursneiddum brieosti yfir. Bakað við 180 gráður í þrú korter.

Gullfallegt gratín í nýja Le Creuset fatinu mínu!

Þegar þrjú korter voru liðin af bökunartímanum hellti ég 600 ml af vatni í ofnskúffuna sem lagði grunninn að sósunni. Þetta soð varð ansi bragðgott. Þegar að lambið fékk að hvíla gerði ég smjörbollu úr 30 gr af smjöri og 30 gr af hveiti.

Gerðum einnig salat með blönduðu grænmeti og avócadó.

Með matnum drukkum við þetta ljúffenga spánska vín, Pata Negra frá 2005 sem er gert úr Tempranillo þrúgum  Þetta er vín er dökkt og heldur þykkt í glasi, ilmar af sólberjum og jafnvel smá leðri. Á bragðið dökk ber - fyllir munninn ágætlega með góðu eftirbragði.

Tími til að njóta.

Grilluð keilusteik með graslaukshollandaise og grilluðu blönduðu grænmeti

Það hefur verið ljómandi gott veður hjá okkur Skánverjum síðastliðna daga. Og það hefur einnig verið mikið að gera bæði í vinnunni og við að leggja síðustu hönd á bókarskrifin. Ég er um þessar mundir að skrifa síðustu atriðin niður, fínpússa inngang. Allar ljósmyndir hafa verið sendar til umbrotsaðila - ég hef tekið næstum 200 GB af ljósmyndum síðastliðna átta mánuði þannig að hann ætti að hafa eitthvað til að vinna úr blessaður.

Snædís var nýlega á Íslandi með litluna að heimsækja vini og vandamenn og þá kom hún heim með margskonar fisk frá Steingrími í fiskbúðinni á Sundlaugaveginum. Hann sendi mér þó nokkuð af íslensku sjávarfangi sem Snædís smyglaði til mín. Það er frábært að vita af því að eiga fullan frysti af íslenskum dásemdarfisk.

Meðlætið, eins gómsætt og það var, varð til við að hreinsa út úr ísskápnum. Síðustu daganna hef ég verið að leggja hönd á síðustu uppskriftirnar og ýmislegt góðgæti safnast fyrir. Auðvitað verður maður að reyna að vera nýtinn. Og úr varð þetta dásamlega grillaða grænmeti.

Yngsta dóttir mín, Ragnhildur Lára, unni sér vel við leik í garðinum í sólarblíðunni!

Grilluð keilusteik með graslaukshollandaise og grilluðu blönduðu grænmeti

Hráefnalisti

1 kg keilusteik
Salt og pipar
2 msk jómfrúarolía

Meðlæti - Grillað grænmeti

1/2 kúrbítur
1 rauðlaukur
1gul, rauð og græn papríka
500 gr kirsuberja tómatar 

4-5 msk hvítlauksolíua
Salt og pipar

Sósa - hollandaise

4 eggjarauður
Safi úr 1/2 sítrónu
1 msk hvítvínsedik
200 gr smjör
Salt og pipar
1 msk graslaukur

Ekki með nokkru móti er hægt að kalla þessa matargerð flókna. Sumir myndu kannski vera hræddir við að gera sína eigin Hollandiase sósu en það er ekket að hræðast. Fylgið bara leiðbeiningunum mínum og þá mun þetta heppnast vel hjá ykkur. 

Og það var ekki mikið gert við fiskinn, eins og sjá má á myndunum. En það er bara svona þegar maður er með framúrskarandi hráefni í höndunum - þá er bara málið að leyfa því að njóta sín eins og kostur er. Og skvetta af jómfrúarolíu, salt og nýlmalaður pipar gerir nákvæmlega það. Styður við undirstöðurnar. 

Og grænmetið var fallegt og lítríkt. Hálfur kúrbítur, einn rauðlaukur, gul, rauð og græn papríka og svo nokkrir marglitir kirsuberja tómatar. 

Og svo það mikilvægasta, fjórar til fmnn msk af heimagerðri hvítlauksolíu. Salt og pipar. Og svo á funheitt grillið í 15-20 mínútur. 

Hollandaisesósan, sem er ein af móðursósunum í franskri matargerð, er gerð á eftirfarandi hátt;

Setjið fjórar eggjarauður í stálskál ásamt safa úr hálfri sítrónu, einni msk af hvítvínsediki og hrærið vel saman. Setjið síðan ofan á vatnsbað og gætið þess að skálarbotninn snerti ekki vatnið beint. Það þarf því að halda í skálina til að finna hversu heit hún er - hræra stöðugt - taka skálina af hitanum þegar maður finnur að hún er að ofhitna - og tempra hitann með því að bæta við smjöri. Þegar eggin fara að hitna þá er köldu smjörinu bætt saman við - smám saman og hrært saman við að krafti. Samtals fara 200 gr af smjöri í sósuna. Saltið og piprið eftir smekk. Blandið síðan einni msk af hökkuðum graslauk saman við sósuna. Og skreytið með nokkrum í viðbót.

Bæði fallegt, seiðandi og bragðgott! 

Með matnum drukkum við þetta rósavín sem ég hafði aldrei bragðað áður en keypti þegar við vorum síðast í Kaupmannahöfn - þó að vín sé á ágætu verði í Svíþjóð þá er verðið enn hagstæðara í Köben! Ég hef drukkið rauðvínið frá sama framleiðanda og það er mjög ljúffengt! Og rósavínið sveik ekki. Þetta er léttur en þó berjaríkur og sumarlegur sopi. Fallega bleikt í glasi.

Ljúffeng sumarmáltið!

Tími til að njóta!

Brúðkaup í Bretlandi; Dansdansdans - Heimagert steikarsalat og svo linsoðin egg með brauðköllum í ferð til Somerset í Englandi

Fyrir tveimur vikum var okkur boðið í brúðkaup til vinafólks okkar í Englandi. Það voru kollegar mínir Hannah Skene og Loiut Thakuria sem giftu sig. Þessu frábæra fólki kynntist ég þegar ég, ásamt Jónasi Geir Einarsyni, fórum á námskeið í lyflækningum - European School of Internal Medicine. Þetta var vikunámskeið í byrjun september árið 2007 (á því blómlega ári) og snemma í vikunni kynntumst við Hannah Skene frá Skotlandi, Roger Duckitt frá Englandi, Monique Valentin frá Hollandi, Esa Joutsinemi frá Finnlandi, Lenka Bosanka frá Slóvakíu og svo Harold Köndgen frá Sviss. Okkur varð mjög vel til vina og höfum síðan þá hisst að minnta kosti árlega og stundum oftar.

Brúðkaupið var haldið í Somerset í Suðvestur Englandi rétt sunnan við Bristol og var haldið á fallegu sveitasetri sem verðandi hjónin höfðu tekið á leigu - Pennard House. Þetta er glæsilegt hús - um 200 ára gamalt með fallegum vel viðhöldnum görðum í kringum húsið. Við lentum í Bristol daginn áður og áttum bókaða næturgistingu skammt frá húsinu.

P.s. Ég bið að sjálfsögðu lesendur velvirðingar á því hvað það hefur verið lítið um að vera á síðunni minni síðastliðnar þrjár vikur. Og ég lofa að það er ekki vegna leti! Ég hef verið með uppbrettar ermar við eldamennsku, ljósmyndun og setið við skriftir á bókinni minni sem á að koma út fyrir jólin.

Hópurinn - The Fabs; Monique, Esa, Roger, Hannah, Loiut, Snædís, undirritaður, Lenka og Harold.

Brúðkaupið heppnaðist stórvel! Maturinn var ljúffengur - gómsætur geitaostur í forrétt, maískjúklingur í aðalrétt og svo ávaxtacompote í eftirrétt. Og vel var veitt og fólk var glatt og það var mikið hlegið!

Hannah er eins og áður sagði af skoskum ættum og tilheyrir Skene clan of the Halyards - gömul skosk ætt. Faðir brúðarinnar, Danus George Moncrieff Skene, er höfðingi ættarinnar, clan chief, og í ræðu sinni bauð hann öllum veislugestum að verða meðlimir The Skene Clan. Og það var ekki lítið sem það gladdi mig - ég var svo snortinn að ég steig í pontu og þakkaði innilega fyrir mig.

Og svo var dansað. Skotar kunna að skemmta sér. Einvala lið skoskra tónlistarmanna stýrði fjörinu og það voru dansaðir skemmtilegir þjóðdansar. 

Og svo var dansað en meira - að þessu sinni réði poppið ríkjum!

Daginn eftir var boðið upp á hádegisverð í einum garðinum í kringum húsið og svo eftir leiki og kveðjur var ekið til Brighton þar sem við gistum hjá Roger, vini okkar, sem er bráðalæknir á nærliggjandi sjúkrahúsi.

Daginn eftir var þörf á einhverju léttara og því var útbúið ótrúlega einfalt steikarsalat með blönduðu grænmeti og aspas.

Fyrst var steikin skorin í sneiðar og marineruð í soyasósu, engifer, hvítlauk og hunangi. Steikt snögga stund á pönnu. Salatið samanstóð af blönduðum grænum laufum, smátt söxuðum vorlauk, rauðri parpríku, basil, steinselju, steiktum sykurertum og grilluðum aspas.

Borið fram með hvítvínsglasi. Delish!

Daginn eftir bakaði Roger handa okkur brauð - en hann er mikill áhugabakari og heldur utan um skemmtilegt verkefni á sjúkrahúsinu þar sem hann starfar; Bake yourself to a happy hospital. Hugmyndin, sem er hans eigin, byggir á því að vikulega bakar hann köku og færir einhverri deildinni með uppskrift og hvetur svo starfsfólkið á þeirri deild að "pay it forward" og baka fyrir starfsfólks annarrar deildar og stuðla þannig að gleði á vinnustaðnum.

Brauðið var ljúffengt;

3 bollar af hveiti, 1 tsk salt, 1 msk sykur, 2 msk rúsínur, 11/2 bolli af blönduðum fræjum (flax, sólblóma, graskers ...), 25 gr þurrger, 2 bollar vatn, 1 msk olía.

Öllu blandað saman - engin þörf á því að hnoða deigið (þó að það verði ábyggilega ekki verra við það). Sett í form og látið hefast í klukkustund. Bakað í 190 gráðu heitum forhituðum ofni í þrjú korter.

Brauðið var skorið niður í lengjur - svokallaða brauðkalla svo hægt sé að dýfa þeim í linsoðin eggin! 

Borið fram með linsoðnum eggjum - stór egg soðin í ekki meira en 6 mínútur, tómötum og auðvitað smjöri. 

Tími til að njóta.