Ljúffengur lax soðinn í kókósmjólk, thai chilli sósu með papriku, rækjum og kóríander

Ég var á Íslandi um helgina og mikið ósköp var þetta skemmtileg heimsókn. Ég fór af stofugangi á fimmtudagsmorgun á gigtardeildinni á Háskólasjúkrahúsinu í Lundi út á lestarstöð, rápaði þar á milli bilaðra lesta áður en ég komst á Kastrup. Þaðan lá leiðin til Íslands þar sem ég skaust út í Fiskbúðina við Sundlaugaveginn og sótti ýmis konar góðgæti til að taka með mér til Lundar og þaðan fór ég beint í útgáfuteiti hjá Berglindi Guðmundssdóttur sem var að gefa út matreiðslubókina - Gulur, Rauður, grænn og Salt. 

Ekki bara er þessi dama hjúkrunarfræðingur, eiginkona og fjögurra barna móðir þá er hún líka þrælöflugur matarbloggari, auk þess sem hún er núna matreiðslubókahöfundur. Þetta er ljómandi góð matreiðslubók með skýra og einfalda framsetningu á fjöldanum öllum af fljótlegum réttum. Hún bauð upp á ljúffenga kjötsúpu í útgáfuteitinu (uppskriftina er að finna í bókinni), og svo fékk ég að smakka hið ljúffenga kúlugott - sem er afar ljúffengt sælgæti sem hún á heiðurinn af að hafa skapað. Kíkið á þessa girnilegu matreiðslubók! 

Úr boðinu hennar fór ég heim til foreldra minna og átti náðugt kvöld. Daginn eftir voru upptökur með Rikku fyrir sjónvarpsþátt sem hún er að fara með í loftið þann 5. desember. Ég eldaði smjörsprautaðan kalkún, ljúffenga fyllingu, rósakál með beikoni og fullkomnar ofnsteiktar kartöflur fyrir hana og tökuliðið hennar. 

Um helgina var svo fjör í Ráðhúsinu í Reykjavík en var Bókamessa í Bókmenntaborg. Þar fékk ég heiðurinn af því að hitta fjöldann allan af fólki sem margir hverjir voru áhugasamir um bókina mína. Ég bauð upp á snittur sem ég smurði "live" og svo þegar að líða tók að kveldi, smá rauðvínsdreitil. Ég var með nokkrar flöskur af Spönsku rauðvíni - Coto Vintage frá því 2009 sem er einkar ljúfur sopi. Og líka á góðu verði - flaskan á ekki nema 2000 kr. Það verður að segjast að það er ansi gott verð. Vínið var dökkt í glasi - kirsuberjatónar, aðeins eikað og ávaxtakennt. 

Á laugardagskvöldið náði ég meira að segja að skjótast upp í bústað með föður mínum þar sem við áttum ljúfa kvöldstund með ljúffengum mat og drykk og skutumst í pottinn undir stjörnubjörtum himni og síðan í gufu áður en við lognuðust útaf - vel fyrir klukkan ellefu! Daginn eftir var svo aftur allt á fullu í Ráðhúsinu! 

Ég náði meira að segja að skjótast í sund áður en við ókum aftur á flugvöllinn. Þvílík helgi! Takk fyrir mig. 

Ljúffengur lax soðinn í kókósmjólk, thai chilli sósu með papriku, rækjum og kóríander

Þessi réttur er svona eldaður út úr frystinum og ísskápnum. Ég sótti það sem til var í frystinum - laxaflak og handfylli af rækjum ásamt smáræði af grænmeti og úr varð þessi ótrúlega einfaldi en ljúffengi réttur. 

Innihaldslýsing

600 gr laxaflak

150 gr rækjur

1 gul papríka

1 rauð papríka

1 stór gulrót

3 hvítlauksrif

5 cm engiferrót

1 lítil rauðlaukur

1 dós kókósmjólk

1 lítil dós sýrður rjómi

1 msk tómatpúré

olía til steikingar

salt og pipar

Skar fyrst lauk, engifer og hvítlauk niður smátt. 

Steikti þetta í einni matskeið af jómfrúarolíu þangað til mjúkt. 

Skar svo niður papríkurnar og steikti með lauknum.

Næst flysjaði ég stóra gulrót - sem ég síðan skar niður með flysjaranum í þunnar sneiðar og steikti síðan með grænmetinu. 

Svo hellti ég saman við kókosmjólkinni, sýrða rjómanum og tómatpúréinu. Hitaði að suðu og lét svo krauma í 20 mínútur til að sjóða aðeins niður. Saltaði og pipraði. 

Roðfletti síðan laxinn og skar í fjóra bita. 

Tyllti svo laxabitunum ofan í sósuna og lét sjóða í nokkrar mínútur. 

Bætti síðan rækjunum saman við. Saltaði vel og pipraði. 

Skreytti loks með fersku kóríander.

Með matnum nutum við þessa ágæta hvítvíns sem ég sótti á Kastrup. Þetta er vörumerki sem flestir Íslendingar kannast við og ekki af ástæðulausu. Þetta er ljómandi gott Chardonnay frá Ástralíu frá 2012. Þetta er fallega gullið í glasi, ungt í nefi með miklum ávexti á tungu, melónu og smjörkennt eins og öll Chardonnay eiga að vera! 

Rækjurnar voru bara settar í síðustu mínúturnar áður en að rétturinn fór á borðið - þær voru heldur smáar og þurftu bara 3-5 mínútur til að eldast í gegn í varmanum frá sósunni!

Einföld en ótrúlega ljúffeng máltíð. Borið fram með Basmati hrísgrjónum og einföldu salati! 

Núna er tími til að njóta! 

Bókin mín fæst núna í öllum verslunum!

Risa-Risotto og ljúffengt focaccia brauð á síðbúnu þrítugsafmæli Snædísar

Mín kæra eiginkona átti afmæli núna á dögunum og við ákváðum að bjóða til veislu. Við sögðum í gríni að við værum að halda upp á þrítugsafmælið hennar - sem í sjálfu sér var satt og rétt þar sem við náðum aldrei að halda það hérna um árið. Þá hafði mér boðist að fara á námskeið í lyflækningum - þar sem 1-2 fulltrúar frá hverju Evrópulandi var boðin þáttaka. Snædís var ekkert yfir sig hrifinn af tímasetningunni, en þar sem myndu halda upp á afmælið síðar hlyti þetta núna að vera í lagi. Og núna 6 árum síðar slógum við til.

Það var nú samt gott að ég fór á þetta námskeið þar sem kynntist hópi lækna frá nokkrum ólíkum löndum og okkur varð mjög vel til vina og höfum haldið sambandi síðan þá. Höfum farið saman á skíði nokkrum sinnum og mætt í brúðkaup, sjá hérna, og veislur hingað og þangað.

Jæja, aftur að þessari veislu. Núna í vor buðum við einnig til veislu þar sem ég gerði paellu - uppskriftina að henni verður að finna í bókinni minni sem mun koma út eftir nokkrar vikur. Núna var semsagt hugmyndin að prófa að gera risotto á sömu pönnuni. Og viti menn - það heppnaðist stórvel!

Risa-Risotto og ljúffengt focaccia brauð á síðbúnu þrítugsafmæli Snædísar

Hráefnalisti

Grunnur fyrir brauð (fyrir veislu)

5 kg hveiti
4 lítrar vatn
100 gr salt
100 gr sykur
4 pakkar þurrger

Focaccia:

Fletja út deigið og dreifa svörtum Kalamata ólívum, grænum ólívum, tómtötum, hvítlauk og fersku rósmarín yfir

Risa-Risotto

5 kg Arboríó hrísgrjón
5 heilir kjúklingar
2 kg sveppir
250 gr smjör
50 ml jómfrúarolía
Salt og pipar
6 laukar
1 búnt sellerí
2 hvítlaukar
1,5 l hvítvín
12 l kjúklingasoð
700 gr Parmaostur
300 gr smjör





Ég byrjaði á því að gera brauðið - ákvað að setja í það þegar á föstudagskvöldið þannig að það fengi góðan tíma til að hefast. Mér finnst brauð sem hafa fengið að hefast lengi við aðeins lægra hitastig gjarnan hafa betra bragð.

Fimm kíló af hveiti, fjórir lítrar af vatni, 100 grömm af salti, 100 af sykri og svo 4 pakka af geri var blandað saman í stórum plastbala. Fékk að hefast fyrst þrjár klukkustundir inni og svo úti yfir nótt við sirka 12 gráður í samtals 16 tíma. 

Setti nóg af hveiti á borðið til að það festist ekki við. Lamið niður og hnoðað í nokkrar mínútur.

Setti jómfrúarolíu í botninn á ofnskúffum og lagði deigið ofan í. Bjó til brunna og hellti svo meiri jómfrúarolíu yfir. Raðaði svo ýmist svörtum Kalamata ólívum, grænum ólívum, tómtötum, hvítlauk og rósmarín og bjó þannig til nokkrar ólíkar útgáfur. Að lokum nóg af salti og svörtum pipar. 

Fékk svo að hefast aftur í klukkustund áður en þær fóru inn í ofninn.

Brauðið heppnaðist vel - varð stökkt að utan með lúngamjúkt að innan. 

Það viðraði frábærlega til veisluhalda. Við settum upp útieldhús og stilltum öllum græjum upp. Fengum borð og stóla lánaða hjá nágrönnunum þannig að allir gætu setið til borðs. 

Allt var tilbúið - svo var bara að byrja að elda.

Steikti 2 kg af sveppum upp úr 250 gr af smjöri og 50 ml jómfrúarolíu. Saltaði vel og pipraði. Þegar þeir voru fallega brúnaðir og ilmuðu dásamlega voru þeir settir til hliðar. 

Hlutaði niður og úrbeinaði fimm kjúklinga sem ég síðan steikti upp úr smjöri og olíu. Þegar þeir voru orðir fallega gullinbrúnir voru þeir lagðir til hliðar.

Steikti síðan sex smátt saxaða lauka, heilt búnt af niðurskornu sellerí og tvo hvítlauka (smátt skorna) á pönnunni. Þegar grænmetið var farið að glansa var setti ég fimm kíló af hrísgrjónum á pönnuna. 

Ég notaði Arboríó hrísgrjón - steikti þau með grænmetinu þangað til að þau fara aðeins að verða ljós í köntunum. Þá hellti ég 1,5 L af hvítvíni saman við og sauð upp áfengið. 

Næst var að setja heimgert kjúklingasoð saman við - könnu og könnu í senn. Ég átti 8 L af heimagerðu soði en það dugði ekki til þannig að ég bætti við 4 L af vatni og smá krafti sem því nam. Auðvitað var saltað vel og piprað. 

Grjónin eru elduð þangað til að þau eru al dente. Þá setti ég 700 gr af Parmaosti saman við ásamt 300 gr af smjöri sem fékk að bráðna saman við grjónin.

Gerðum einfalt salat; grænlauf, tómata og parmaost í bitum. Bjó til einfalda dressingu á salatið - einn hlutur balsmikedik, þrír hlutar jómfrúarolía, tvær teskeiðar dijon sinnep, einn saxaður hvítlauksgeiri og svo salt og pipar. 

Og svo var bara að gefa fólki að borða! Og að drekka. 

Við vorum bæði með Lindemans Chardonnay hvítvín í búkollum - sem stendur alltaf fyrir sínu og svo Trivento mixtus rauðvín frá Argentínu sem er blanda af Shiraz og Malbec - alveg ljómandi góður sopi sem við gerðum góð skil um kvöldið. 

 Ég sá ekki betur en að þetta hafi runnið ljúflega niður!

Tími til að njóta!

Chablis kjúklingur á grillinu í Lækjarkoti

Þetta er einn af mínum uppáhalds kjúklingaréttum og hef ég eldað hann oft upp á síðkastið. Hann er sérlega ljúffengur. Og ætli það sé ekki vegna þess að ég held að þetta sé mín eigin "orginal hugmynd". Ég gerði hann fyrst þegar við vorum í húsbílaferð um Frakkland haustið 2010. Þá leigðum við forlátan húsbíl og fjölskyldan, ásamt bróður mínum, lagði land (réttara sagt hjól) undir fót. Við ókum um Bruges í Hollandi, síðan til Champagne héraðs, þá til Búrgúndar, til Júra og svo Sviss og loks tilbaka í gegnum Alsace. Dásamleg ferð. Hægt er að sjá upprunalegu færsluna hérna.

Eitt kvöldið dvöldum við á vínekru Jean Marc Brochard rétt utan við Chablis. Um daginn höfðum við gert okkur ferð í bæinn og verslað sitt lítið af hverju - kjúkling, sýrðan rjóma og splunkunýjar kantarellur. Og úr varð þessi réttur.

Núna erum við stödd í sumarbústað foreldra minna við Meðalfellsvatnið - stemmingin ljúf og góð þrátt fyrir veðrið. Náðum meira að segja í smá sólarglætu á miðvikudaginn þegar við elduðum þennan frábæra rétt!

Chablis kjúklingur á grillinu í Lækjarkoti

Hráefnalisti

3 heilir kjúklingar
Salt og pipar
3 msk jómfrúarolía
2 tsk hvítlaukskrydd
2 laukar
500 gr sveppir
100 gr smjör
250 ml hvítvín
3 dósir sýrður rjómi
4 msk Djion sinnep
Salt og pipar

Meðlæti - steiktar kartöflur

800 gr kartöflur
Salt og pipra
1 msk smjör
Kjúklingafita

Ég byrjaði á því að úrbeina þrjá kjúklinga. Lagði vængina til hliðar og notaði bara bringurnar og leggina. Velti þeim upp úr smá olíu, salt og pipar og svo hvítlaukskryddi.

Skar svo tvo lauka í sneiðar, 500 gr af sveppum og steikti í 100 gr af smjöri. Saltaði og pipraði. 

Þegar sveppirnir voru vel karmelliseraðir voru þeir settir til hliðar og kjúklingurinn brúnaður.

Þegar hann var búinn að taka lit á öllum hliðum þá setti ég sveppina saman við og hitaði í gegn. Hellti svo yfir þetta 250 ml af hvítvíni og sauð upp. Þá setti ég þrjár dósir af sýrðum rjóma og 4 kúfaðar matskeiðar af Djion sinnepi útí. Þessu var öllu blandað vel saman og eldað á grillinu í 20 mínútur.

Með matnum vorum við með kartöflur í sneiðum, saltaðar og pipraðar og svo steiktar í smjöri og kjúklingafitunni þangað til fallega gullinbrúnar.

Ég keypti þessa búkollu í Ríkinu á leiðinni út úr bænum. Þetta er uppáhalds hvítvínið hennar mömmu minnar. Þetta vín hef ég drukkið margoft áður - og kannski ekki svo skrítið þar sem það er ansi ljúffengt. Þetta er fallega sítrónugult vín með góðan ávaxtakeim.

Borið fram með góðu salati. Allir sáttir, saddir og glaðir!

Og jafnvel þó að Chablisvín hafi hvorki verið sett í réttinn né drukkið með honum, fór ég samt í huganum suður til Frakklands - til Chablis héraðs í Búrgúnd og rifjaði upp dásamlega kvöldið sem við áttum þar saman fjölskyldan!

Tími til að njóta.