Frumsýningarpartí í Café Flóru - Lambið og miðin - Heilgrillað lamb með steiktu grænmeti, hvítlaukssósu, kraftmikilli tómatsósu og salati, borið fram á tortillu fyrir góða gesti

Til að fagna sýningu þáttanna Lambið og miðin buðum við framleiðendurnir, undirritaður og Kristján Kristjánsson, til veislu í Grasagarðinum - nánar tiltekið í Café Flóru sem skartar sýnu fegursta þessa daganna. Gróðurinn að springa út og ilmurinn í kaffihúsinu eftir því. Okkur fannst þetta alveg tilvalinn staður til þess að sýna þættina okkar enda leikur náttúran svo stórt hlutverk í þáttunum. 

Það var virkilega gaman að halda þessa veislu. Auðvitað ekki einungis vegna þess að uppáhalds trúbadorinn minn og vinur, Svavar Knútur, kom og söng fyrir okkur. Og auðvitað ekki bara vegna þess að svona stórtæk eldamennska er í sérstöku uppáhaldi hjá mér - heldur sérstaklega vegna þess að ég veit fátt skemmtilegra en að gefa fólki að borða. Sérstaklega vinum og vandamönnum. 

Ég þarf sennilega ekki að segja mikið um þættina mína - ég hef nú látið valin orð falla á síðunni minni, Facebook, Insta og svo í fjölmiðlum en mér þykir ekkert leiðinlegt að endurtaka það! Við Kristján erum óskaplega stoltir af þessum þáttum. Við lögðum okkur fram við að reyna að gera eins fallega matreiðsluþætti sem við gátum þar sem við værum að beina allri athygli að al-íslensku hráefni með lamb og sjávarfang í aðalhlutverki og auðvitað líka fullt af íslensku grænmeti og kryddjurtum. Við getum sannarlega verið stolt af þessu hráefni. Og það er eiginlega auðvelt að láta mat líta vel út þegar maður eldar hann úti í íslenskri náttúru. En það sakar ekki að maturinn heppnaðist líka einstaklega vel og var allur borðaður upp til agna. 

En það voru ekki bara Kiddi og ég sem gerðum þessa þætti - okkur við hlið voru tökumennirnir, Árni Þór og Elvar Örn og svo hjálpaði bróðir minn, Kjartan, með að stilla upp, stílisera auk þess að vera vera alltmúligmaður á setti. En við fimm, lögðum land undir fót, og elduðum og tókum upp í fjölbreyttu landslagi og stundum í krefjandi veðráttu. Og svei mér þá, ef það heppnaðist ekki bara. 

Ég held alltént að þetta séu fallegustu matreiðsluþættir sem gerðir hafa verið á Íslandi (en ég er auðvitað ekki alveg hlutlaus - þið dæmið það auðvitað) 

Frumsýningarpartí í Café Flóru - Lambið og miðin - Heilgrillað lamb með steiktu grænmeti, hvítlaukssósu, kraftmikilli tómatsósu og ljúffengu fersku tómatsalati, borið fram á tortillu fyrir góða gesti

Einhver myndi kannski halda að það að heilgrilla lambaskrokk sé vesen - þá er það ekki. Það er í raun frekar auðvelt, eigi maður til þess tæki og tól. 

Hráefnalisti fyrir 50

Lambið

1 lambaskrokkur (15-16 kg) 

stór poki af kryddblöndunni minni - Yfir holt og heiðar

750 ml jómfrúarolía

salt og pipar

Fyrir grænmetið

50 sveppir

20 papríkur

10 rauðlaukar

handfylli döðlur (án steins)

salt og pipar

olía og smjör til steikingar

Fyrir tómatsalat

1/2 kassi tómatar skornir í ferninga

4 rauðlaukar

8 hvítlauksrif

5 basil

5 steinseljuplöntur

250 ml jómfrúarolía

safi í 3 sítrónum

salt og pipar

Fyrir kraftmikla tómatsósu

5 dósir af niðursoðnum tómtötum

2 hvítir laukar

6 hvítlauksrif

4 rauðir chili

2 dósir tómatmauk

4 msk sirachasósa

handfylli basil og steinselja

jómfrúarolía til steikingar

Fyrir kalda sósu

1,5 kg sýrður rjómi

500 g majónes

2 hvítlaukar

4 msk Yfir holt og heiðar kryddblanda

safi úr fjórum sítrónum

börkur af tveimur sítrónum, smátt skorinn

5 msk jómfrúarolía

salt og pipar

Bar einnig fram dásamlegt íslenskt klettasalat og svo fullt af Heiðmerkurblöndu.

Jæja, byrjum á þessu. Fyrst er að nudda lambið vel og rækilega upp úr kryddblöndunni sem ég hafði vætt upp úr jómfrúarolíu. Saltaði og pipraði rækilega. Svo er bara að skipa Tomma Hermannsyni, útgefanda, að henda öðrum áformum út um gluggann og koma og standa við grillið. Hann gengur fyrir bjór og er heldur ódýr á fóðrum. Hann er líka reynslumikill skrokkagrillari og hefur grillað skrokka með bræðrum sínum í áratugi.

Á meðan Tommi grillaði skar ég niður allt grænmetið og steikti upp úr olíu á stórri paellu pönnu sem ég hef átt um langt skeið og kemur sér afar vel á fjölmennum mannamótum. Bragðbætti með döðrum og ferskum kryddjurtum. 

Berglind Guðmundsdóttir, matarbloggari, mætti fyrst og fékk því það verkefni að standa við paellupönnuna á meðan ég fór í eldhúsið og kláraði næstu skref. Átti því miður ekki mynd af henni við pönnuna. En Berglind stóð sig með eindæmum vel. 

Þegar í eldhúsið var komið var að undirbúa tómatsósuna. Skar niður lauk, hvítlauk og chili og steikti upp úr olíu. Saltaði og pipraði. Bætti svo niðursoðnum tómtötum, tómatmauki, sirachasósu og fersku kryddi saman við. Lét þetta krauma um stund og sjóða niður aðeins og þétta sig.

Svo skar ég niður fullt af dásamlega sætum kirsuberjatómötum og blandaði saman við rauðlauk, jómfrúarolíu og meira af kryddjurtum. Saltaði vel og pipraði.

Svo fóru gestirnir að týnast inn. Svavar Knútur kom og tók lagið en hann á bróðurpartinn af tónlistinni í þáttunum okkar. Snædís kom í tæka tíð og hjálpaði mér í eldhúsinu. Það borgar sig að vera vel giftur.

Vinir mínir, Bryndís Pétursdóttir, Sverrir Jan Norðfjörð, Trausti Óskarsson og sonur hans Elí og Snædís veltu vöngum um hvenær maturinn yrði borinn fram.

Svavar vætti kverkarnar með Kristal ásamt Magnúsi Hjaltalín sem var á vaktinni í Klíníkinni.

Sigríður Valtýsdóttir yfirlæknirinn minn, Svanhildur Sigurjónsdóttir, Anna Guðný, Sævar og Anna Karen og Valdís hlustuðu á mig halda smá tölu.

Svavar Knútur var allt í öllu og opnaði dyrnar fyrir dóttur minni, Valdísi Eik, syninum Vilhjálmi Bjarka og Sindra.

Það þurfti að sjálfsögðu að væta kverkarnar. Við buðum upp á Bola, Kristal, Barone Montalto hvítvín og Rosemount rauðvín. Ekki slæmt það!

Svavar Knútur gladdi okkur öll með dásamlegum söng. 

Svo mátti segja "gjörðu svo vel". Villi Bjarki var ekki lengi að næla sér í vefju og gos. 

Það er ekki hægt að segja annað en að stemmingin á Café Flóru sé einstök. Aðeins tvö börn duttu ofan í tjörnina!

Ég gat ekki betur séð en að gestirnir tækju vel til matar síns - enda orðnir svangir á biðinni. 

Gerður Gröndal, Heimir, Helena Gunnarsdóttir og Berglind Guðmundsdóttir virtust vera spennt fyrir matnum.  

Það var ekki annað hægt en að skála fyrir þessu dásamlega fólki og þakka því fyrir að vera með mér á þessum frábæra degi.

Takk fyrir mig!

Naustavík og Hveravellir - Lambið og miðin - Uppskriftir úr þætti tvö: Kolagrillaður þorskur og kjötsúpa með ólöglegu efni

Þáttur númer tvö af Lambið og miðin var í opinni dagskrá í kvöld á sjónvarpi Símans. Vona að sem flest ykkar hafi séð þáttinn. Og kannski ennþá mikilvægara að þið sem sáuð hann hafið haft gaman af. Og ef svo er þá væri ég óskaplega þakklátur að fá að heyra frá ykkur. Hvað ykkur fannst? 

Ég, og Kristján Kristjánsson leikstjóri, erum alltént óskaplega stoltir af þessum sjónvarpsþáttum. Við höfðum ansi háleit markmið þegar við settumst niður og ákváðum að fara í þetta ferðalag. Markmiðið var að gera fallegasta matreiðsluþátt sem gerður hefur verið á Íslandi. En það er ekki mitt að dæma hvort að það hafi tekist. Það er auðvitað ykkar sem á horfið. 

En við reyndum samt að gera þetta "auðvelt" fyrir okkur. Það var með því að láta ótrúlega náttúru Íslands, í sumarlitunum sínum, fá alveg sérstakt pláss í þáttunum okkar. Og ég vona einlæglega að það hafi tekist. 

Naustavík og Hveravellir - Lambið og miðin - Uppskriftir úr þætti tvö: Kolagrillaður þorskur og kjötsúpa með ólöglegu efni

Þessar uppskriftir eru til viðmiðunar. Þeir sem fylgdust með þættinum tóku líklega eftir því að nákvæm mál voru aldrei notuð – heldur var farið meira eftir tilfinningu – og svo giskað á hversu mikið var notað.

Hér koma svo uppskriftirnar; 

Kolagrillaður þorskur fylltur með íslenskum tómötum, rauðlauk, glás af kryddjurtum borinn fram með brenndu timjan-bættu lauksmjöri og fylltum papríkum

Þessar uppskriftir eru til viðmiðunar. Þeir sem fylgdust með þættinum tóku líklega eftir því að nákvæm mál voru aldrei notuð – heldur var farið meira eftir tilfinningu – og svo giskað á hversu mikið var notað.

Fyrir sex

1 nýveiddur þorskur
1 sítróna
1 rauðlaukur
1 tómatur
handfylli af ferskum kryddjurtum
smjör
jómfrúarolía
salt og pipar

4 gulir laukar
200 g smjör
20 timjan-greinar

3 papríkur
1 dós rjómaostur
1 dós rjómaostur með pipar
handfylli ferskar kryddjurtir
salt og pipar
jómfrúarolía

Ætli fyrsta skrefið sé ekki að veiða þorskinn, já, eða panta hann í fiskbúðinni ykkar. Fiskbúðin á Sundlaugaveginum er ekki í neinum vandræðum með að útvega ykkur heilan þorsk. Kosturinn við að elda fiskinn í heilu lagi er að það tryggir að hann verði einstaklega meir og beinin viðhalda rakanum í kjötinu. Þegar hann er eldaður í gegn rennur kjötið svo auðveldlega af beinunum sem verða eftir á beinagrindinni.

Troðið kviðarholið með sneiðum af sítrónum, rauðlauk, tómati, smjöri og svo eins mikið af ferskum íslenskum kryddjurtum og hægt er. Pakkið fisknum svo vandlega inn í álpappír og komið fyrir á grillinu. Snúið einu sinni. Fiskurinn er til á um 40 mínútum.

Skellið lauknum beint í kolin. Þegar ytra byrðið er brunnið - setjið laukinn til hliðar og leyfið honum að kólna. Það er þess virði að bíða - þar sem hann er brennandi heitur. Skerið brunna lagið utan af og leggið í álbakka. Bætið smjöri ofan á og svo timjan. Setjið svo á kolin og eldið í 20 mínútur eða svo.

Skerið papríkurnar í helminga og kjarnhreinsið. Blandið rjómaostinum vandlega saman og hrærið smátt saxaðar kryddjurtir saman við. Saltið og pipið. Fyllið svo papríkurnar með blöndunni og leggið í bakka. Bakið í um 30 mínútur.

Það er ekki hægt að segja annað en að elda í Naustavík var ógleymanleg lífsreynsla! 

Auðvitað þakkar maður svo fyrir sig með því að gefa góðu fólki, Elísabetu leiðsögumanni og Hlyni skipstjóra gott í gogginn! 

Ný al-íslensk kjötsúpa með ólöglegu efni frá Hveravöllum

Fyrir sex til átta (og jafnvel fleiri)

1,5 kg súpukjöt frá Norðurlandi

nokkrar radísur

2 púrrulaukar

1 gulur laukur

2 hvítlauksrif

marglitar papríkur

5 tómatar

8 heilar flysjaðar gulrætur

6-8 kartöflur, flysjaðar

nokkur grænkálslauf í grófum strimlum

handfylli perlubygg frá Vallanesi

vatn til að hylja hráefnið

timjan, rósmarín, steinselja í kryddvöndul

salt og pipar

jómfrúarolía og smjör til steikingar

Fyrir gremolata

1 hvítlauksrif

börkur af hálfri sítrónu, fínt saxaður

1 rauður chili

Byrjið á því að saxa laukinn, púrruna, radísurnar og hvítlaukinn niður og steikið í nokkrar mínútur. Saltið og piprið. Þegar grænmetið er orðið mjúkt setjið það til hliðar. 

Saltið og piprið kjötið og brúnið það svo upp úr smjöri og jómfrúarolíu. Þegar það er fallega brúnað bætið svo grænmetinu, sem þið steiktuð, saman við. Hellið nóg af vatni til að hylja kjötið. 

Bindið kryddjurtirnar upp í kryddvöndul og látið krauma með. Látið krauma í 60-90 mínútur á lágum hita þar til kjötið er lungamjúkt. 

Undirbúið svo gulræturnar, tómatana, papríkurnar, grænkálið og byggið og bætið saman við kjötsúpuna og sjóðið áfram í 30 mínútur.

Veltið fyrir ykkur hversu vel þetta á eftir að smakkast. 

Útbúið gremolata með því að mauka hvítlaukinn smáttt og blanda við fínt skorin sítrónubörk og chili. Saltið og piprið. 

Bjóðið gestunum út að borða við fallegan hver - eða bara heima í stofu.

Ég sá ekki betur en að Páll og Heiðbjört gerðu kjötsúpunni minni góð skil!

Verði ykkur að góðu!

Sérstakar þakkir við gerð þessa þáttar fá:

Hlynur skipstjóri á Kjóa

Elísabet Ýr Guðjónsdóttir, leiðsögumaður
Páll Ólafsson, garðyrkjubóndi
Heiðbjört Þóra Ólafsdóttir, garðyrkjubóndi
Kokka

Egill Sigurðsson
Land Rover á Íslandi
Sölufélag garðyrkjubænda
Sláturfélag Suðurlands
Norðursigling

Þið eigið allar okkar þakkir skyldar! 

mbk,

Ragnar

Beisik eldamennska - Hakk og Spaghetti 2.0 - einfaldur og ljúffengur hversdagsmatur

Ætli hakk og speghetti sé ekki það fyrsta sem við eldum þegar við spreytum okkur í eldhúsinu fyrstu skiptin. Og svo er þetta líka algerlega "go to" réttur þegar krakkarnir eru svangir og maður er að brenna út á tíma. Svo má líka nefna að þetta getur verið einkar ljúffeng máltíð - eldi maður rétt, eins og ég tel mig hafa gert og skrifa um í þessari færslu. Það eru nokkrar leiðir til að "djassa" upp þessa máltíð og gera hana að veislumáltíð fyrir unga sem aldna; svo góða að enginn í eldhúsinu er að biðja um að fá tómatsósu til að skerpa á kjötinu og lita spaghettíið. 

Beisik eldamennska - Hakk og Spaghetti 2.0 - einfaldur og ljúffengur hversdagsmatur

Fyrir fimm

500 g spaghetti

500 nautahakk

1/2 hvítur laukur (átti afgangs frá því um helgina)

1/2 rauður laukur (átti afgangs frá því um helgina)

1 pakki af parmaskinku

200 ml nautasoð

150 ml rjómi

75 g smjör

salt og pipar (ekki svo mikið af salti þar sem parmaskinkan er heldur sölt)

Allar góðar uppskriftir byrja á því að bræða smjör á pönnu. Það er ekkert að því að bæta smá jómfrúarolíu saman við. Það drepur engan.

Rífið parmaskinkuna í bita.

Skerið laukinn smátt.

Steikið öll herlegheitin á stórri pönnu.

Steikið nautahakkið vandlega að utan, saltið og piprið. Bætið nautasoðinu saman við og sjóðið niður um helming. Því næst rjómanum og sjóðið aftur niður. 

Sé einhver afgangur af rauðvíni helgarinnar er kjörið að það fái að mæta örlögum sínum í þessari kjötsósu. Ef þið eruð að nota rauðvín gætið þess að að setja það bara á undan nautasoðinu og látið það sjóða rækilega niður. Eins mætti vandræðalaust bragðbæta þetta með tómatmauki en ég lét það vera þar sem mig langaði til að gera þessa kjötsósu alveg án tómata. 

Sjóðið svo sósuna niður þannig að hún verði þétt og falleg.

Á meðan sósan kraumar er spaghetti soðið í vel söltuðu vatni. Bætið nokkum matskeiðum af pastavatninu saman við kjötsósuna.

Ég notaði þessa bragðbættu jómfrúarolíu til að krydda það sem ég hafði sett á diskinn minn. Þessi er það bragðmikil að ég var ekkert að bæta henni út í alla sósuna. 

Með matnum fengum við okkur svo smá tár af þessu ljúffenga víni frá Andesfjöllunum. Þetta er vín frá síleanska framleiðendanum Concha y toro og kallast Terrunyo Carmenére. Þetta vín er einstaklega bragðmikið, með miklum sultuðum ávexti og kryddað á tungu. Hefði passað með góðri steik en það stóð sig svo sannarlega vel með þessum rétti!

Verði ykkur einstaklega að góðu! 

Endilega kíkið á þáttinn minn á Sjónvarpi Símans á fimmtudögum klukkan 20:10 eða í Sjónvarpi Símans Premium þar sem öll serían af Lambið og miðin er fáanleg.

------

Flest hráefnin í þessari færslu fást í verslunum Hagkaupa

Mývatn og Tungulending, Lambið og miðin - Uppskriftir úr þætti eitt: Hverasoðin bleikja með stúfuðu spínati og snöggpæklaðri agúrku, mývetnsk snitta og bryggjubollur með kartöflu- og rófumús

Ég vona að þið hafið haft gaman af því að horfa á sjónvarpsþáttinn okkar. Við erum sannarlega stoltir af honum.

Þessar uppskriftir eru til viðmiðunar. Þeir sem fylgdust með þættinum tóku líklega eftir því að nákvæm mál voru aldrei notuð – heldur var farið meira eftir tilfinningu – og svo giskað á hversu mikið var notað.

Ég er þó nokkuð sannfærður um að ef farið verður eftir þessum uppskriftum sem hér fylgja verði úr einstaklega ljúffengar máltíðir.

Lambið og miðin - Uppskriftir úr þætti eitt: Hverasoðin bleikja með stúfuðu spínati og snöggpæklaðri agúrku, mývetnsk snitta og bryggjubollur með kartöflu- og rófumús

Hérna koma svo uppskriftirnar;

Gufusoðinn silungur á beði af stúfuðu spínati með snöggpæklaðri agúrku

Að elda í hver er auðvitað ekki á hvers manns færi. En fyrir þá sem eiga gufuofn er auðvitað leikur einn að herma eftir uppskriftinni. En íslensk bleikja verður ekkert síðri við að vera bökuð í heitum bakarofni. Sannið bara til.

Hráefni fyrir 4

Tvö silungsflök
1 sítróna
handfylli blandaðar kryddjurtir
50 g smjör
salt og pipar

150 g spínat
½ laukur
100 ml hvítvín
2 hvítlauksrif
skvetta af hvítvíni
50 g smjör
150 ml rjómi
handfylli ferskar kryddjurtir
skvetta sítrónusafi
salt og pipar

½ agúrka
100 ml hvítvínsedik
safi úr einni sítrónu
1 msk salt
1 msk sykur
pipar

500 g kartöflur
100 g smjör
salt og pipar
handfylli steinselja

Aðferð

1. Skerið agúrkuna í helminga og kjarnhreinsið. Skerið hana því næst í þunna strimla og leggið í skál.
2. Hellið edikinu yfir ásamt sítrónusafanum.
3. Blandið sykrinum, saltinu og piparnum saman við og látið standa í klukkustund til að mýkast.
4. Skerið sítrónu í sneiðar og leggið í ofnskúffu og leggið silungsflakið ofan á. Setjið handfylli af kryddjurtum undir flakið. Saltið og piprið, sáldrið afgangnum af kryddjurtunum ofan á.
5. Bakið í 200 gráður heitum ofni í 15 mínútur.
6. Til að útbúa spínatið byrjið þið á því að skera laukinn og hvítlaukinn og steikið upp úr heitu smjöri. Bætið víninu á pönnuna og látið sjóða upp og svo niður um helming.
7. Bætið næst við spínatinu og látið það visna á pönnunni um rúman helming áður en þið hellið rjómanum saman við.
8. Bætið kryddjurtum á pönnuna, salti og pipar og smá sítrónusafa og látið sjóða niður um helming.
9. Kartöflurnar eru soðnar á hefðbundinn hátt, velt upp úr bráðnu smjöri og kryddjurtum. Saltið og piprið.

Mývetnsk snitta

Kannski er rangt að kalla þetta snittu. Stærðin bendir heldur til þess að þetta sé opin samloka. Mér fannst þessi snitta einstaklega ljúffeng. Steinunn, móðir hans Antons, ráðlagði mér að skynsamlegra væri að skera brauðið aðeins þynnra. Næst held ég að ég geri það – hún veit, jú, hvað hún er að tala um. Svo er varla hægt að vera að tala um eldamennsku þegar maður þegar um það eitt er að ræða að raða áleggi ofan á brauð. En eggin voru, jú, elduð, þannig að það telst kannski með.

2 þykkar sneiðar gufusoðið rúgbrauð frá Mývatni
10 sneiðar af þunnt skorinni Mývatnsbleikju
3 andaregg
¼ rauðlaukur
2 msk sýrður rjómi
ferskt steinselja til skreytingar
ný ætihvönn (val)
salt og pipar

1. Brjótið eggin í skál, saltið og piprið, og þeytið saman með gaffli.
2. Steikið eggjakökuna upp úr smjöri, veltið henni á pönnunni þannig að hún verði um centimetri að þykkt. Setjið til hliðar og látið kólna.
3. Smyrjið rúgbrauðið með smjöri.
4. Leggið eggjakökuna ofan á og raðið því næst þunnt skornum silungi ofan á eggjakökuna.
5. Setjið sýrðan rjóma, smátt skorin rauðlauk, steinselju og ætihvönn (sé hún fyrir hendi).

Bryggjubollur úr kindahakki með kartöflu- og rófumús

Ég hef lengi velt vöngum yfir því af hverju þjóð sem hefur dregið fram lífið með því að ala upp sauðfé eigi ekki hafsjó af uppskriftum úr hökkuðu lambakjöti. En það er þá í okkar valdi að búa til nýjar “klassískar” uppskriftir. Eins og þessa.

Fyrir 6-8

Fyrir bollurnar

1 kg kindahakk
5-6 hafrakex
100 ml rjómi
1 msk kryddblanda að eigin vali
handfylli ferskar kryddjurtir – timjan, rósmarín, steinselja
1 tsk þurrkað blóðberg
1 rauðlaukur
2 hvítlauksrif
2 andareggjarauður
salt og pipar
smjör til steikingar

Fyrir sósuna

250 g portobello sveppir
3 hvítlauksrif
½ hvítur laukur
1 glas rauðvín (eftir smekk)
1 msk tómatmauk
1 msk djion
salt og pipar

Fyrir kartöflu- og rófumúsina

1 kg kartöflur
1 rófa
200 g smjör
4 msk rjómaostur
salt og pipar

1. Brjótið kexið niður og bleytið upp í því með rjómanum.
2. Setjið allt hráefnið í kindabolluuppskriftinni saman í skál og blandið vel saman.
3. Hnoðið í bollur á stærð við golfbolta. Það er gott að olíubera hendurnar til að deigið klístrist ekki við mann.
4. Steikið bollurnar þangað til að þær eru brúnar að utan og takið svo til hliðar.
5. Skerið hvítlaukinn, laukinn og sveppina niður og steikið á sömu pönnu.
6. Fyrir þá sem vilja kraftmeiri sósu er um að gera að bæta rauðvíni á pönnuna. Og sjóða það niður um helming.
7. Bætið svo sýrða rjómanum á pönnuna, ásamt tómatmauki, djionsinnepi, salti og pipar. Tyllið svo bollunum ofan í sósuna til að elda þær í gegn.

Fyrir músina

1. Flysjið og sjóðið kartöflur og rófu.
2. Hellið vatninu frá og stappið svo smjör, rjómaost saman við vandlega.
3. Blandið rjómanum saman við og saltið og piprið eftir smekk.

Sérstakar þakkir við gerð þessara þátta fá eftirfarandi:

Anton Birgisson
Steinunn Ósk Stefánsdótti
Birgir V Hauksson

Sveitahótelið á Skútustöðum
Egill Sigurðsson
Kokka
Land Rover á Íslandi
Sölufélag Garðyrkjubænda
Sláturfélag Suðurlands

Einlægar þakkir, 

Ragnar

Rifin "pulled" lambaframpartur með mangó-jalapenö aoili, steiktum svartbaunum og fersku kóríander

Þó það hljómi kannski pínu kjánalega þá er þessi máltíð raunverulega skyndibiti. Það tók ótrúlega lítin "virkan" tíma í eldhúsinu frá því að þessi réttur var undirbúinn og síðan borinn fram - tæpar 30 mínútur. Það verður þó að játast að biðtími var nokkur - en framparturinn var eldaður í rúmar fjórar klukkustundir. En þetta er líka einföld eldamennska. 

Þetta gladdi líka fjölskylduna - taco er alltaf í uppáhaldi. Og það er gaman að prófa ólík hráefni, prófa annarskonar grænmeti, baunir og mismunandi kjöt. Mér finnst eiginlega ekki hægt að bera fram tacó án þess að vera með einhverskonar baunir með - þær geta líka komið í staðinn fyrir kjötið óski maður þess. 

Rifin "pulled" lambaframpartur með mangó-jalapenö aoili, steiktum svartbaunum, tómatsósu og fersku kóríander

Það væri auðvitað hægt að nota tilbúna kryddblöndu en það er leikur einn að gera þetta sjálfur frá grunni. Mér finnst taco-krydd alltaf einkennast af broddkúmeni og því fær það auðvitað stórt hlutverk í minni blöndu. 

Hráefnalisti fyri 6 

1 lambaframpartur

6 msk jómfrúarolía

1 msk broddkúmen

1 msk papríkuduft

1 msk piparkorn

1 tsk cheyenne pipar

1 msk salt

1/2 msk kóríander 

1/2 msk laukduft

1/2 msk hvítlauksduft

1 dós svartar baunir

1 rauður laukur

2 hvítlauksrif 

2 msk jómfrúarolía

salt og pipar 

fersk steinselja

4 msk majónes

1/2 mangó

2 msk jalapenö

1 hvítlauksrif

Byrjaði á því að útbúa kryddblönduna. Kom kryddinu öllu fyrir í mortéli og steytti vandlega niður.

Svo var bara að nudda lambinu upp úr olíu og svo nóg af kryddblöndunni. 

Svo setti ég 250 ml af vatni í ofnpottinn, lokið á og inn í 170 gráðu heitan ofn í rúma fjóra tíma. 

Svo bjó ég til þetta geggjaða aioli. Skar mangó, hvítlauk og jalapenö smátt og blandaði saman við majónesið. Smakkaði til með salti og pipar.

Svo voru það baunirnar. Skar niður laukinn og hvítlaukinn og steikti við lágan hita í nokkrar mínútur. Skolaði baunirnar upp úr köldu vatni og bætti saman við. Saltaði og pipraði og bætti svo við smáræði af ferskri steinselju. 

Framparturinn var svo vel eldaður að kjötið var að detta af beinunum.

Kjötið var svo rifið gróflega með gaffli og blandað saman við vökvann sem hafði safnast fyrir í ofnskúffunni.

Kjötið var eins meyrt og hægt var að ímynda sér.

Ég prófaði að smakka þessa búkollu - Trapiche Malbec frá Mendóza héraði í Argentínu. Malbec er lang algengasta þrúgan sem ræktuð er til rauðvínsgerðar þar í landi. Þetta er ljómandi góður rauðvínssopi - ávaxtaríkt vín og með mildu  og ljúfu eftirbragði. 

Þetta var, sko, sannarlega veislumáltíð!

-------

Flest hráefnin í þessari færslu fást í verslunum Hagkaupa