Saturday 18 May 2013

Safarík T-bone nautasteik með tómat-estragonsósu og blönduðu grænmeti


Það er mikið um að vera á heimilinu um þessar mundir. Ég hef verið í leyfi frá minni hefðbundu vinnu á gigtardeildinni í Lundi og sinni núna bókinni minni í fullri vinnu og aðeins rúmlega það. Ég þarf reyndar að vinna í næstu viku en þá verð ég aftur á barnagigtardeildinni. Skrítið að segja það að en ég sakna alltaf pínulítið vinnunnar minnar - þó svo að mér finnst alveg meiriháttar að vera að elda - don't get me wrong! Þetta eru mikil forréttindi að finnast bæði vinnan sín og áhugamálin svona skemmtileg!

Ég er, eins lesendur síðunnar kannski vita, mikill aðdáandi bernaise sósu - ætli það sé ekki sú sósa sem ég hef bloggað hvað mest um, enda er það ekki skrítið þar sem hún er algerlega frábær, a.m.k. að mínu mati. Hér var hún elduð eftir kúnstarinnar reglum, sjá hér. Hérna reyndi ég að gera létta útgáfu, sjá hér. Hér var hún að hætti Úlfars Finnbjörnssonar - en borin fram með konfiteruðu lambalæri, sjá hér. En þó að bernaisesósa sé góð þá eru líka til aðrar góðar sósur til að hafa með grilluðu nautakjöti (skipta sennilega þúsundum) og þessi er einkar ljúffeng. Hana hef ég gert nokkrum sinnum áður og hún á sérstaklega vel við þegar það er heitt er í veðri.


Veðrið er búið að leika við okkur síðastliðna daga og það hefur ekki verið neitt vandamál að vera úti að elda. 

Safarík T-bone nautasteik með tómat-estragonsósu og blönduðu grænmeti

Það væri nú réttara að kalla þetta L-bein steikur þar sem það var búið saga annan hlutann af T-inu af.


 Byrjaði á því að gera sósuna - sem er létt og frískandi.


Tómatsósan er fremur einföld. Fyrst er að hakka niður fjóra rauða tómata. Sett í skál. Þá er hálfur rauðlaukur, einn smár skarlottulaukar, tvö hvítlauksrif skorin smátt niður og bætt í skálina með tómötunum. Tveimur matskeiðum af góðri tómatsósu er bætt saman við, einnig safa úr hálfri sítrónu, tvær tsk af Worchestershire sósu (prófaðu að segja það hratt), tvær tsk af grófu sinnepi (djion/skánskt), nokkrar hristur af Tabascó sósu og loks saltað og piprað eftir smekk. Svo setti ég eina msk af hökkuðum graslauk og eina msk af fersku estragoni. Blandað vel saman og látið standa í ísskáp í rúma klukkustund.


Steikurnar voru penslaðar með olíu og saltaðar vel og pipraðar. Mér hafði borist sending af íslensku salti frá Saltverk - sem er gert eftir gamalli íslenskri aðferð. Þetta salt er framleitt á Vestfjörðum og er ljúffengt - skarpt og gott! Mæli eindregið með því að við styðjum við bakið á íslenskri framleiðslu! Þetta gefur Maldon saltinu ekkert eftir!


Skar niður ein heilan kúrbít og raðaði í bakka ásamt nokkrum niðursneiddum radísum og nokkrum aspasspjótum sem höfðu orðið afgangs síðan daginn áður. Olía, salt, pipar og svo sítrónusneiðar.
Grillað í nokkrar mínútur. Smá hvítvíni skvett á grænmetið undir lokin.


Grillað við öskrandi hita eina til tvær mínútur á hvorri hlið þangað til medium rare.


Bjútiful!


Raðað á disk.

Þetta er í annað sinn sem ég smakka þetta vín. Baron de Ley Finca Monasterio frá því árið 2009. Þetta er spánskt vín frá Rioja héraði. Vínið gert úr 80% tempranillo þrúgum en blandað 20 prósent Cabernet Sauvignion. Vínið er dumbrautt og þykkt í glasi. Ilmurinn nett kryddaður með ríkum ávexti. Bragðið með svipuðum tónum - mjúk fylling, aftur dökk ber og jafnvel smá súkkulaði. Virkilega ljúffengt vín.


Tími til að njóta!

Monday 6 May 2013

Indverskt fiskikarrí með grilluðu naanbrauði og hrísgrjónum




Ég fann íslenskar steinbítssteikur í frystinum hjá mér sem ég hafði keypt þegar við vorum síðast á Íslandi. Þær höfðu grafist eitthvað undir öðru gúmmelaði. Steinbítur er náttúrulega einn ljótasti fiskur sem um getur og er þó samkeppnin í ljótfiskakeppninni ansi hörð. En steinbítur er góður fiskur, alltént að mínu mati. En það eru ekki allir sammála um gæði steinbítsins! 


Ég hef vitnað í þá afbragðs skemmtilegu bók - Fiskiveisa fiskhatarans - eftir Gunnar Helga Kristinsson nokkrum sinnum þegar ég hef verið að elda þennan fisk en hann segir "Steinbítur er frekar bragðmikill fiskur, ljótur og stundum dálítið vatns- eða gúmmíkenndur. Hann er á köflum hreint og klárt óætur. Ýmsir telja að hann henti fyrst og fremst til suðu. Hann er samt ekki góður soðinn. Eina matreiðslan sem hentar steinbít er grill og þá aðeins að með honum séu ansi sterf bragðefni, en vert er að hafa í huga að hann er mismunandi vondur eftir árstíðum". Svo mörg voru þau orð. 


Ég hafði fyrr um daginn verið að lesa mér til um karríuppskriftir á netinu og rataði þá á eina uppskrift sem mér leist vel á. Ég hripaði niður nokkur atriði sem mér leist vel á og bætti öðru við. Svona er það með uppskriftir - það þarf ekki mikið að breyta og bæta til að geta kallað uppskriftina sína! Eða hvað?


Indverskt fiskikarrí með grilluðu naanbrauði og hrísgrjónum


Hráefnalisti


1 kg steinbítur
2 stjörnuanísar
2 tsk broddkúmen
1/2 tsk negulnaglar
2 tsk  kóríanderfræ
1/2 tsk þurrkuð chilli
1 tsk túrmerik

1 msk sykur
1 tsk salt 

5 hvítlauksgeirar
5 cm engifer
1 1/2 msk hvítvínsedik
2 laukar
2 stórir tómatar
1 dós kókósmjólk
100 ml  vatn
1 grænmetisteningur
Salt og pipar
1 rauður chilli


Naan brauð

400 gr hveiti
1 tsk salt
1 tsk lyftiduft
1/3 tsk matarsódi
1 jógúrtdós
Vatn
3-4 msk hvítlauksolía
Salt og pipar



Fyrsta verk er að undirbúa masalapastið. 



Ég byrjaði á því að taka til tvo stjörnuanísa, tvær tsk broddkúmen, hálfa tsk negulnagna, tvær tsk af kóríanderfræjum, hálfa tsk af þurrkuðum chilli og ein tsk af túrmeriki. 




Og ristaði síðan á pönnu. Ilmurinn í eldhúsinu verður dásamlegur. Setti svo kryddin í mortél ásamt einni matskeið af sykri, einni teskeið salt og barði saman. 




Næst setti ég fimm hvítlauksgeira og fimm cm af hökkuðum engifer og eina og hálfa matskeið hvítvínsediki og blandaði vel saman.


Skar niður tvo hvíta lauka og steikti laukinn í jómfrúarolíu í nokkrar mínútur og bætti síðan masalapastinu saman við. 




Þvoði tvo stóra tómata og hakkaði í matvinnsluvél og bætt saman við sósuna. Ásamt einni dós af kókósmjólk, 100 ml af vatni og einum grænmetisteningi.  Saltað og piprað. Bætti við einum rauðum chilli, sem ég hafði opnað og kjarnhreinsað og sauð með. Sauð sósuna í 30 mínútur áður en ég setti fiskinn útí. 




Á meðan sósan sauð var skellt í brauðið. Það er einfalt að baka svona naanbrauð. Ég hef áður bloggað um þetta naanbrauð sem ég kalla "akút naan" brauð vegna þess hversu fljótlegt það er!  400 gr af hveiti hellt í skál, ein tsk af salti, ein tsk lyftiduft, einn þriðji tsk matarsódi, ein jógúrtdós og svo smávegis vatn til að binda þetta í silkimjúkan klump.


Svo var klipið af deiginu og það flatt út í litla klatta, penslað með hvítlauksolíu og saltað með Maldon salti og svo þurrgrillað á heitu "griddle" (stór grillpanna) þar til tilbúið.

Sett á disk.



Steinbítssteikunum var síðan bætt ofan í pottinn og látnar sjóða með í tíu mínútur þangað til að þær voru eldaðar í gegn. 





Við fengum okkur þetta vín með matnum - sem er núna í nýjum búningi. Peter Lehmann Chardonnay er vín sem við höfum smakkað áður og er ljúffengt. Vínin frá Peter Lehmann eru alltaf góð kaup. Peter Lehmann Chardonnay 2010 er ljómandi gott. Þetta er klassískt Chardonnay - ilmar af ávöxtum, sömuleiðis ávextir á tungu, smjörkennt og eikað. Stendur alltaf fyrir sínu!




Borið fram með hrísgrjónum.

Tími til að njóta!